| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 27.11 | Dem. 27.14 (English) | >>Dem. 27.16 |
27.12καὶ τὸ μὲν πλῆθος τῆς οὐσίας τοῦτʼ ἦν τὸ καταλειφθέν , ὦ ἄνδρες δικασταί . ὅσα δʼ αὐτῆς διακέκλεπται καὶ ὅσʼ ἰδίᾳ ἕκαστος εἴληφεν καὶ ὁπόσα κοινῇ πάντες ἀποστεροῦσιν , οὐκ ἐνδέχεται πρὸς ταὐτὸ ὕδωρ εἰπεῖν , ἀλλʼ ἀνάγκη χωρὶς ἕκαστον διελεῖν ἐστίν . ἃ μὲν οὖν Δημοφῶν ἢ Θηριππίδης ἔχουσι τῶν ἐμῶν , τότʼ ἐξαρκέσει περὶ αὐτῶν εἰπεῖν , ὅταν κατʼ αὐτῶν τὰς γραφὰς ἀπενέγκωμεν · ἃ δὲ τοῦτον ἔχοντʼ ἐξελέγχουσιν ἐκεῖνοι καὶ ἐγὼ οἶδʼ αὐτὸν εἰληφότα , περὶ τούτων ἤδη ποιήσομαι τοὺς λόγους πρὸς ὑμᾶς . πρῶτον μὲν οὖν ὡς ἔχει τὴν προῖκα , τὰς ὀγδοήκοντα μνᾶς , τοῦθʼ ὑμῖν ἐπιδείξω , μετὰ δὲ ταῦτα καὶ περὶ τῶν ἄλλων , ὡς ἂν δύνωμαι διὰ βραχυτάτων .
οὗτος γὰρ εὐθὺς μετὰ τὸν τοῦ πατρὸς θάνατον ᾤκει τὴν οἰκίαν εἰσελθὼν κατὰ τὴν ἐκείνου διαθήκην , καὶ λαμβάνει τά τε χρυσία τῆς μητρὸς καὶ τὰ ἐκπώματα τὰ καταλειφθέντα . καὶ ταῦτα μὲν ὡς εἰς πεντήκοντα μνᾶς εἶχεν , ἔτι δὲ τῶν ἀνδραπόδων τῶν πιπρασκομένων παρά τε Θηριππίδου καὶ Δημοφῶντος τὰς τιμὰς ἐλάμβανεν , ἕως ἀνεπληρώσατο τὴν προῖκα , τὰς ὀγδοήκοντα μνᾶς .
27.14καὶ ἐπειδὴ εἶχεν , ἐκπλεῖν μέλλων εἰς Κέρκυραν τριήραρχος , ἀπέγραψε ταῦτα πρὸς Θηριππίδην ἔχονθʼ ἑαυτὸν καὶ ὡμολόγει κεκομίσθαι τὴν προῖκα . καὶ πρῶτον μὲν τούτων Δημοφῶν καὶ Θηριππίδης , οἱ τούτου συνεπίτροποι , μάρτυρές εἰσιν · ἔτι δὲ καὶ ὡς αὐτὸς ὡμολόγει ταῦτʼ ἔχειν , Δημοχάρης θʼ ὁ Λευκονοεύς , ὁ τὴν τηθίδα τὴν ἐμὴν ἔχων , καὶ ἄλλοι πολλοὶ μάρτυρες γεγόνασιν .
27.13
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 27.11 | Dem. 27.14 (English) | >>Dem. 27.16 |
